फिल्म निर्माता शिवराज कार्की पक्राउ परेका छन् । युरोपमा पठाउने भन्दै २ सय बढी युवाहरुलाई ठगी गरेको कसुरमा प्रहरीले उनलाई पक्राउ गरेको हो । एक दशकदेखि चाबहिलमा पी एन्ड एम इन्नोभेटिभ सर्भिसेज नामक कन्सल्टेन्सी चलाइरहेका उनले युवाहरुलाई क्रोएसिया, रोमानिया, इटाली लगायतका देशमा रोजगारीका लागि पठाइदिन्छु भन्दै २ करोड ५० लाखभन्दा बढी रकम लिएर ठगी गरेर फरार भएको भन्दै वैदेशिक रोजगारसम्बन्धी कसुरमा ६ वटा पक्राउ पुर्जी जारी भएको थियो । कार्कीले दुई सयभन्दा बढी सर्वसाधारणबाट प्रतिव्यक्ति २० लाखसम्म पैसा लिएको प्रारम्भिक अनुसन्धानबाट खुलेको छ । वैदेशिक रोजगार न्यायाधिकरणले भदौ ४ गते नै उनीविरुद्ध पक्राउ पुर्जी जारी गरेको थियो ।
बिज्ञापन
सोही आधारमा अपराध अनुसन्धान कार्यालयको टोलीले भारतको नयाँदिल्लीस्थित पहाडगञ्जबाट पक्राउ गरेर काठमाडौं ल्याएको थियो । वैदेशिक रोजगार न्यायाधिकरणबाट २०८२ भदौ ४ गते पक्राऊ पुर्जी जारी भएपछि उनी नेपालबाट भागेर भारतको नयाँ दिल्लीमा रहेको पहाडगञ्ज इलाकामा अन्नपूर्ण फास्ट फुड नामक मोमो पसल सञ्चालन गरी बसेका प्रहरी अधिकारीहरुले जनाएका छन् । भारतबाट पक्राउ गरी नेपाल ल्याइएको कार्कीले भारतमै आधार कार्ड र प्यान कार्डसमेत बनाइसकेको पाइएको छ ।
बिज्ञापन
वैदेशिक रोजगार ठगीमा पक्राउ परेका शिवराज कार्की तेल भिसा नामक फिल्मको निर्मातासमेत हुन् । उनले यस अघि ‘चि मुसी चि’, ‘तेल भिसा’ लगायतका चलचित्रहरुको निर्माण गरिसकेका छन् । उसो त निर्माता कार्कीविरुद्ध यस अघि पनि अमेरिका लैजान्छु भनेर ठगी गरेको आरोपमा उजुरी परेको थियो । निर्देशक शंकर घिमिरे र उनकी श्रीमती निर्मात्री तथा अभिनेत्री ऋचा घिमिरेविरूद्ध ०८१ कात्तिको अन्तिममा उजुरी परेको थियो । यो चलचित्र ०८१ मंसिर ७ गतेबाट प्रदर्शनमा आएको थियो । अमेरिका बस्दै आएका नेपाली समुदायको कथामा यो चलचित्र निर्माण भएको थियो ।
बिज्ञापन
